imagens e sombras de santa maria madalena na literatura e arte portuguesas - a construção de uma personagem: simbolismos e metamorfoses - helena barbas - fev.2003 |
[] Anónimo - Cantinela provençal, séc. XI
Cantinella de la Sancta Maria Magdalena [1]
Allegron los peccador
Lauzan santa Maria
Magdalena devotament.
Ella conoc la sieu’ error,
Lo mal que fach avia,
Et ac del fuec d’enfer paor
Et mes si en la via
5 Per que venguet a salvament.
Allegron los peccador
Lauzan santa Maria
Magdalena devotament.
Adonc s’en venc al Salvador
Que a taula sesia
A quo de Simon lo lebror
Em be grand compagnia,
10 Et ploret molt amarament.
Allegron los peccador...
De l’aiga que, de sos grands plor
Se seus bels hueils eissia,
Li lavet los peds per doussor
Et puis sos pels prenia,
15 Torcava los y humilment.
Allegron los peccador...
Per demonstrar maior amor,
La dona mai fasia
Qu’ambe l’enguent de grand doussor;
Lo cap de Christ ognia
20 D’un dorc ric e precios enguent.
Allegron los peccador...
Murmureront en li pulsor.
Simon aissin disia:
- «Aquest a qui fasem honor,
«Si agues professia
25 «Non sofrira tal tocament.»
Allegron los peccador...
Jesus Christ sap d’aquel lo cor
L’enuic et la folia:
- «Simon, li dis lo bons Seignor,
«A tu parlar volria
30 «Per donar ti enseignament.»
Allegron los peccador...
«I erat un grand prestador:
«Dos debitors avia.
«Aquel que era lo maior
«Cinq cent deniers devia,
35 «L’autre cinquanta solament.»
Allegron los peccador...
«Quand ac vist aquel prestador
«Que pagar non podia
«L’un ni l’autre d’aquests deutor.
«Per sa grand cortesia
40 «Aquiet los egalament.»
Allegron los peccador...
«Diguas, Simon, que mai d’amor
«Ad el portar devia?»
- «Per mi, Simon respond, Seignor,
«Plus tengut en seria
45 «Cel a qui mai prestet d’argent.»
Allegron los peccador...
Adonc Jesus Christ prestador
Si giret vers Maria;
Devant totz li dis: «Ta follor
«Perdonata ti sia,
50 «Car m’as amat entierament.»
Allegron los peccador...
Quand l’agron mort Jusieu traidor
Per lur grand fellonia,
En Joseph, per sa grand doussor,
(Aicel d’Arimathia),
55 Lo mes en lo sieu moniment.
Allegron los peccador...
Ella s’en venc apres l’aubor,
Car l’honrar la vollia.
Li dis l’Angils: - «A grand clairor
«Jesus Christ que queria
60 «Resuscitat es verament.»
Allegron los peccador...
Predicant de Christ la lauzor,
Los pagans convertia
Et Marsilha gitet d’error.
Que predicant l’auzia
65 Si convertiam aamantament.
Allegron los peccador...
A Marsilha l’emperador
Promes qu’enfant auria,
Si creses lo sieu bon Seignor
Ni sa follor giquia
70 Et fases lo sieu mandament.
Allegron los peccador...
Ben ac lo reys gauch e feror,
Quand vis qu’encar vivia
La regina qu’en grand tristor
Morta laissat avia
75 Et son enfant trobet gauzent.
Allegron los peccador...
Magdalena e’l Creator
Lo reys molt fort gratia
Et ac en Dieu mai de tremor,
Car solet el cresia
80 Et fe creire molt d’autra gent.
Allegron los peccador...
En la balma de grand feror,
Nostre Seignor servia:
Fanfon’ auzet au grand pilor
Sens null’autra paria.
85 Sola estet molt longament.
Allegron los peccador...
«Magdalena per ta doussor,
«Met nos en bona via
«Et prega nostre Salvador
«Que piatos nos sia,
90 «Quand venra la sieu jujament.»
Allegron los peccador...
«Non vos desperatz, peccador!
«Laissatz la mala via,
«Ayatz de los peccats dolor,
«Ploratz com ieu fasia
95 «Et trobaretz perdonament.»
Allegron los peccador...
Or si preguem tut lo Salvador,
Filh de santa Maria,
Que nos garde tot de dolor
E’l poblum cum que sia
100 Toc’en sa verjamantement.
Allegron los peccador...
Et sos pairis san Maximin,
Que l’a ensebellia,
Pregue per nos sera matin,
Per sa grande cortesia
105 Trestotz duxent a salvament.
Allegron los peccador...
Or diguem tut: Amem! Amem!
C’aissi sensa bauzia
Prenem comjat devotament
Tota la compagnia,
110 De cor, de cors, allegrament!
Allegron los peccador...